الاختيار الواسع..!

بعد أن علّقت زياراتي للمطعم الذي اعتدت عليه، وبعد أن شجعني أصدقائي على مطعمٍ فيه اختيارات أو خيارات واسعة، وبناءً على تجربتهم حيث كانوا دائماً معزومين، ولم يدفعوا يوماً الفاتورة، لكنهم أكدوا أن ذبحه حلال، وطعامه حلال، ورزقه حلال…

دخلت إلى المطعم الجديد، وكانوا قد أعلنوا في دعايات ونشرات أنه عندهم اختيار واسع لكل ما تشتهيه العين ويطيب به اللسان..

(أدخل من باب المطعم ويواجهني مباشرة أحد عمال الخدمة مرحباً):

ــ تفضل يا استاذ! شو بتؤمرو؟ تحب أن تأكل؟ تحب أن تشرب شيئاً؟ أو قد ترغب مشاهدة البرنامج الفني الراقص؟ موسيقى راقصة؟ مشاهدة راقصات؟ تايلاندية أو روسية؟ عندنا راقصات عربيات، بس تفضل واختار من أي رقص شرقي تحب؟.ديسكو؟ آه .. حضرتك ما بتحب الموسيقى الغربية؟ مو مشكلة عندنا موسيقى  صومالية، وسي دي(سيدي) فولكلور أفغاني….وعندنا…..

+ حم حم، (بداية جيدة، لم أكن أعرف أنه يوجد هنا كل هذ)ا. قلت خليني هاللق آخذ شي كاسة بيرة على السريع، لكن طالما الوضع هيك يمكن آكل شي شغلة صغيرة كمان..

عامل الخدمة بكل رحابة صدر:

ــ مثل ما بتريد أستاذ.. حضرتك وين بتريد تجلس؟ عندنا طاولة جانب الشباك، أو بالقرب من المطبخ، كمان فيه طاولة قريبة على المسرح، طاولة عليها شرشف ولا بلا شرشف، مكان المدخنين أو في مكان ممنوع التدخين…. شو أستاذ يمكن حابب تقعد على الترراس بّرا؟.

+ أوكي، أوكي، (باسترخاء وبكل أريحية) مثل بعضها، أي مكان راح يكون كويس ومناسب.

وخلال خطواته أمامي باتجاه الطاولة محنيٌّ الظهر قليلاً احتراماً أكمل حديثه:

ــ شو بجيب للأستاذ؟ مشاوي، طبخ؟ أو حضرتك نباتي ما بتحب تأكل لحومات؟ يمكن تريد معكرونة؟ أو شوربة؟ عندنا سلطات من مختلف الأصناف، طبعاً الحمص والمتبل مع صحن سرفيس مخللات على كيفك.. اللي بتحبو نحن هون جاهزين لخدمة حضرتك. نحن هون كلنا لخدمة الضيف، الزبون..

+ لحظة، وقف شوية من فضلك! شي أكلة خفيفة وبسيطة، أوكي؟ بدون تعقيدات، أوكي؟ وشكراً..

(يمسك خادم المطعم قائمة طلبات الأطعمة والمشروبات ويقدمها):

ــ يمكن اقترح عليكم شي طبق صغير من المشاوي؟ فيه لحم بقري.. لحم عجل.. خروف من أذكى اللحوم، ولا بتحب أستاذ دجاج مشوي؟ كمان عندنا حبش بلدي.. أو بط، ولا بتريد حضرّ لكم وجبة  وز؟ يمكن الأستاذ بتحب تأكل سمك؟ بحري ولا  نهري.. نحن يا أستاذ….

+ (يا إلهي، هذي ما راح تكون جولة سهلة. رغم إني صرت أشعر بالجوع شوية).. يمكن.. يمكن يكون كويس لحم الحبش. (مسحت جبهتي من العرق)..

ــ حاضر، تكرم..اختيار رائع أستاذ، يعني طبق لحم شرائح حبش… مشويّة.. فيها فليفلة وشويّة خضروات.. أو مطبوخة بالزيت..؟ وشو رأيك….

+ (هالزلمي بدو يجنني.. صارت إيدي ترجف.. ) مشويّة وبس.. (بنظرة تهكم متعبة)..

ــ شيْ رائع يا أستاذ.. اختيار جميل.. يعني شرائح حبش مشويّة! وشو بتريد إلى جانب اللحم؟ رز بشعيرية.. أو بدون شعيرية.. مطبوخ بالفرن أو على الغاز.. رز مع شوية فاصولياء خضراء، ولا بتحب أستاذ برغل أصلي؟ أو ممكن أقترح عليك….

(شعرت بزحلقة الكرسي تحتي، ونزلت عن الكرسي قليلاً  تحت الطاولة..)..

+ ما في عندكم إمكانية اختيار ببساطة أكثر شوية.. مثل بعضها،(ما عاد  فرقاني معي.. بس إخلص من هالورطة).. حتى لو رغيف خبز؟ (قلتها  بتوسلٍ لخادم المطعم)…

ــ طبعاً أستاذ، مثل ما بتريدوا بأمركم، طبعاً اللي حضرتك بدّك إياه.. خبز أبيض ولا أسمر؟ ولا نصف أسمر؟ فيه عندنا خبز فرنسي.. وفيه خبز مع نخالة.. ولا الأستاذ رايد خبز تنور؟ فيه عندنا خبز صاج من أحسن ما يكون.. فطاير عكّوب وسبانخ.. ورئيس المطبخ بس بإمكانو يعمل لحضرتك خبز تركي.. ولا بتريد خبز قراص إيرانية بالينسون؟ هذي أستاذ مثل المرشّم إذا بتسمعوا فيه….

+ شو؟ مرّشّم؟..(هاللق إجاني الجنون، بحب  لو بقدر أضربه شي ضربة بكل قوة لفش غلّي..). لكن كان من الضروري الاختيار….(لأنه كنت أشك أنني لم أستطيع أن أحصل على شيء).. نصـــف أسمـــــــــر..(قلتها بتقطع وتأتأة)..

ــ اختيار رائع يا أستاذ! أني كنت بدّي إقترحو عليكم.. شو بتأمر حضرتك من السلاطات؟ شو رأيك تكون تشكيلة رئيس المطبخ؟ ولا بتحب سلطة خيار وبندورة؟ يمكن يكون فيها شوية بصل أخضر.. حبة ثوم صغيرة؟ فلفل.. مايونيز.. تبولة لبنانية أصلية؟..  أو بحب الأستاذ رشة بهارات حادة من السودان؟..

+ يالّلــــه… بدك تجنني.. بتعرف، جيب ورق خس وخلّصنا!…

ــ مثل ما بتريد أستاذ.. هذي سلطتي المفضلة، فيها حديد وبتخلّي الزلمي مثل الحديد.. (قالها بغنج وتصنع).. نحن هون لخدمة الزبون، بتريد على الخس شوية حامض وزيت؟  الضيف عندنا قبل كل شيء وفوق كل شيء.. وشو بتحب حضرتك تشرب شي قبل الأكل؟ مقبلات لفتح الشهية؟.. أو بتريدو عصير فواكه؟.. مياه غازية.. أو مياه معدنية بدون غاز.. سيادتك بتحب تشرب كونياك؟ ويسكي كمان موجود بعدة أنواع.. نحن هون أستاذ بيدخل لعندنا أجانب، عدم المؤاخذة.. وحضرتك بتعرفو إنو الضيف هو الملك عندنا… ولا بتحب مشروبات خالية من الكحول؟.. أو كابوتشينو.. ولا قهوة بدون كوفايين…عندنا قهوة عربية مو مغشوشة… أو شو رأيكم بكاسة كوكتيل خلطة المعلم؟.. بس حضرتك….

ــ (هذا كان سهل، اختيار واضح) بيرة.. بيرة وبس..

+ ممتاز.. أستاذ عندك ذوق رائع.. واختيار رائع.. البيرة مشروب جيد ولذيذ ومنعش..(قالها بلطافة واحترام كبير). طيب حضرتك أي نوع بتحب تشرب؟ بيرة ألمانية ولا تشيكية؟ في عندنا أنواع بلجيكية فاخرة..أو بتحبو بيرة محلية؟ بتحب زجاجة أو علب؟ بيرة شعير أو بيرة ذرة؟.. إذا بسمح لنفسي أقترح عليكم فيه عندنا بيرة "كاستل"، بيرة بلجيكية فاخرة، لو بتذوقها يا أستاذ راح تتذكرنا دائماً.. كمان إذا كنت حضرتك جاي بالسيارة أو ما بتشربو مشروبات فيها كحول، الله يرضى علينا جميع (قالها بخشوع متطلعاً للأعلى، حيث توجد الثريا).. في عندنا بيرة خالية من الكحول ،حلال انشاء الله.. يمكن….

ــ (اسوّدت الدنيا بوجهي في هاللحظة)… وما شفت بعدها غير  صورة لطاولة المطعم من الجهة السفلى، وصورة طبيب الإسعاف عا بيقيس الضغط في إيدي، وخادم المطعم بوجه مرتبك يتأسف لما حصل..

+ انشاء الله ما فيه مشكلة أستاذ، بقدر ساعدك بشيء….

ــ لا، أني كويس (قلتها بصعوبة).. كاسة ماء..

+ طبعاً أستاذ، هذا شيء واجب.. وبهالحالة ضرورية كاسة الماء.. بس حضرتك، شو النوع اللي بتحب تشربه؟ مياة غازية ولا طبيعية، ولا…

(علقت الحروف في حنجرتي وما قدرت جاوبه، لكن اللي شفتو إنو الطبيب علّق الكيس المغذي وربطه في إيدي، وحسب قوانين الفيزياء والجاذبية لنيوتن بن فيليب الأسدي الحميري، سالت القطرات نقطة – نقطة في دمائي، حافظة الحياة حتى نهاية هذا التعليق..)، وكما يقال عندنا بالضيعة "كل عنزة معلقة بكرعوبها"… أرجو تعليق التعليقات حتى الوقت المناسب..

 وكل تعليق واختيار واسع وأنتم بخير…

فاضل الخطيب، 1 / 4 / 2009.